'केवळ चांगले इंग्रजी येत नाही, म्हणून नोकरीची संधी गेली,' असे व्हायला नको, यासाठी विद्येच्या माहेरघरातील अनेक विद्यार्थी 'साहेबा'ची भाषा शिकण्यास प्राधान्य देत आहेत. विद्यार्थ्यांची ही 'व्याप्ती' केवळ 'कॅम्पस प्लेसमेंट'ची तयारी करणाऱ्यांपर्यंत मर्यादित नसून, पहिली नोकरी सोडून दुसरी नोकरी शोधणाऱ्यांपासून, अजून शाळाही पूर्ण न केलेल्यांपर्यंत, इतकी मोठी ही 'रेंज' आहे.
पुण्यामध्ये जर्मन, फ्रेंच, जपानी आदी परकीय भाषा शिकणाऱ्यांची संख्या वाढत असल्याचे चित्र गेल्या दोन दशकांपासून आहेच; पण जोडीने इंग्रजीचे खास शिक्षण घेण्याचा ट्रेंडही मोठ्या प्रमाणावर वाढतो आहे. अनेक कॉर्पोरेट कंपन्यांनी प्लेसमेंटसाठी इंग्रजी संभाषणाची; तसेच भाषेची परीक्षा घ्यायला सुरुवात केल्याने चांगले इंग्रजी ही नोकरीची गरज बनली आहे.
याच पार्श्वभूमीवर, इंग्रजी सुधारण्याची इच्छा असलेल्यांसाठी 'ब्रिटिश कौन्सिल'चा 'माय इंग्लिश' हा कोर्स जगात प्रथम पुण्यात सुरू होत आहे. पुण्यात इंग्रजी शिकण्यासाठी वाढत असलेली उत्सुकताच यासाठी कारणीभूत असल्याचे 'ब्रिटिश कौन्सिल'च्या संचालक (पश्चिम भारत) शेरॉन मेमिस यांनी सांगितले.
'पुणे हे मोठ्या प्रमाणावर सांस्कृतिक घुसळण होत असलेले शहर आहे. येथील विद्यार्थी आणि तरुण वर्ग महत्त्वाकांक्षी असून, आंतरराष्ट्रीय पातळीवरील संधी मिळवण्यासाठी आपले कौशल्य वाढवण्याची या वर्गाची तीव्र इच्छा आहे. त्यामुळेच कोर्सची घोषणा केल्यापासून केवळ दोनच आठवड्यांत आमच्याकडे काहीशे लोकांनी कोर्सची चौकशी केली आहे,' असे मेमिस यांनी नमूद केले.
त्या म्हणाल्या, 'माय इंग्लिश कोर्सची चौकशी करणारा पहिला फोन एका पन्नाशीच्या गृहस्थांनी केला होता. मध्यमवयीन नोकरदारांनाही इंग्रजी सुधारण्याची गरज भासत असल्याचे यातून समोर येत आहे. कोर्सच्या प्रवेशासाठी किमान वय १८ वर्षे असूनही शालेय विद्यार्थ्यांचे अनेक पालकही आमच्याकडे कोर्सची चौकशी करत आहेत. त्यासाठी भविष्यात नवा कोर्स सुरू करण्याचाही आमचा प्रयत्न राहील.'
'चांगले इंग्रजी येण्यामुळे कॉर्पोरेट जगतात मिळणारी स्वीकारार्हता हे इंग्रजी शिकण्याचे मूळ कारण आहे. आमच्याकडे येणारे अनेक विद्यार्थी हे प्रामुख्याने नोकरी शोधणारे किंवा नोकरदार आहेत. पदवी अभ्यासक्रम संपत आलेले अनेक विद्यार्थी आमच्या स्पोकन किंवा रिटन इंग्लिशच्या वर्गांना प्रवेश घेतात. त्याचप्रमाणे करिअरमधील प्रगतीसाठी इंग्रजी वाढवणे आवश्यक असलेले विद्यार्थीही या वर्गांना येतात,' असा अनुभव 'सिम्बायोसिस'च्या 'एल्टिस' या इंग्रजी प्रशिक्षण संस्थेतील प्रशिक्षक अंशुमान खुर्जेकर यांनी सांगितला.
इंग्रजीकडे अनेकजण जगाशी जोडले जाण्याची भाषा म्हणून पाहत आहेत. चांगले इंग्रजी आले, तर करिअर आणि शिक्षणामध्ये उंची गाठू शकतो, असा विश्वास असल्याने इंग्रजी शिकण्याची आकांक्षा दिसते आहे. अनेकांना त्यांच्या विषयाचे ज्ञान चांगले आहे; पण त्यांचे विचार इंग्रजीमध्ये अभिव्यक्त करता येत नाहीत. अनेक जण तर इंटरनेटचा प्रभावी वापर करण्यासाठीही इंग्रजी शिकायचे आहे, असे सांगत आहेत.
- शेरॉन मेमिस, संचालिका, 'ब्रिटिश कौन्सिल' (पश्चिम भारत)
मोबाइल अॅप डाउनलोड करा आणि राहा अपडेट
