म. टा. प्रतिनिधी, पुणे
सॉफ्टवेअर इंजिनीअर नयना पुजारी खून प्रकरणातील मुख्य आरोपी योगेश राऊत ससून हॉस्पिटलमधून पळून गेल्याप्रकरणी कोर्टाने त्याला दोषी धरले आहे. त्याच्या शिक्षेची सुनावणी शनिवारी होणार आहे. प्रथमवर्ग न्यायदंडाधिकारी एस. आर. निमसे यांच्या कोर्टात ही सुनावणी होणार आहे.
नयना पुजारी खूनप्रकरणाची जिल्हा न्यायालयात सुनावणी सुरू असताना राऊत फरार झाला होता. तो फरार झाल्यानंतर दीड वर्षांनी त्याला पकडण्यात यश आले होते. राऊतला पळून जाण्यासाठी मदत केल्याच्या प्रकरणातून त्याचा भाऊ मनोज अशोक राऊत (२५, रा. गोलेगाव, खेड), सतीश अशोक पाडेकर (२८, रा. सावरगाव घुले, संगमनेर) यांची सबळ पुराव्याअभावी कोर्टाने निर्दोष मुक्तता केली.
सागर सहानी अपहरण व खून प्रकरणात जन्मठेपेची शिक्षा भोगत असलेल्या नितीन शांतीलाल मोढा (३३, मूळ रा. मोकर, पोरबंदर) याने राऊतला पळून जाण्यास मदत केल्याच्या कारणावरुन त्याच्यावर गुन्हा दाखल करून अटक करण्यात आली होती. मात्र, त्याला या गुन्ह्यातून वगळण्यात आले. तसेच पोलिस कर्मचारी सुमेरसिंह सूरसिंग पाटील (रा. विश्रांतवाडी पोलिस वसाहत) यांच्यावरील खटला वेगळा चालविला जाणार आहे.
योगेश राऊत अंगाला खाज सुटत असल्याचा बहाणा करून ससून हॉस्पिटलमध्ये दाखल झाला होता. तेथून तो १७ सप्टेंबर २०११ पळून गेला होता. त्याला पळून जाण्यास मदत केल्याप्रकरणी त्याचा भाऊ मनोज आणि त्याचा मित्र सतीश यांना अटक करण्यात आली होती. राऊत फरारी झाल्याच्या प्रकरणाचा तपास तत्कालीन पोलिस निरीक्षक सतीश गोवेकर यांनी केला. राऊतला ३१ मे २०१३ रोजी शिर्डी येथून अटक करण्यात आली होती.
या खटल्यात सरकारी वकील सुचित्रा नरोटे यांनी अकरा साक्षीदार तपासले. राऊतला उपचारासाठी येरवडा जेलमधून सुमेरसिंह पाटील यांच्या हवाली केले होते. त्या कारागृह पोलिस कर्मचारी निवृत्ती चव्हाण, यांची साक्ष खटल्यात महत्त्वाची ठरली. वाकडमधील दुर्गा हॉटेलमध्ये राऊत रवीकुमार रावत या नावाने राहिला होता. या हॉटेलचे व्यवस्थापक नितीन शेट्टी यांनीही साक्षी दरम्यान राऊतला ओळखले. साक्षीदार पंच अविनाश शेळके यांच्या समोर ३१ मे २०१३ रोजी त्याला शिर्डी येथून अटक करण्यात आली होती. ही साक्षही खटल्यात महत्वाची ठरली.
मोबाइल अॅप डाउनलोड करा आणि राहा अपडेट
