पूर्णपणे मोफत असलेल्या आधार कार्डाच्या नोंदणीसाठी पैसे उकळण्याचे प्रकार शहराच्या काही भागांमध्ये सुरू असल्याच्या तक्रारी जिल्हा प्रशासनाकडे आल्या आहेत. अशा प्रकारे पैसे आकारणाऱ्या केंद्रचालकांवर कारवाई करण्यात येईल, असा इशारा उपजिल्हा निवडणूक अधिकारी समीक्षा चंद्राकार यांनी दिला आहे.
प्रत्येक व्यक्तीला स्वतःची ओळख म्हणून आधार कार्ड वाटपाची योजना सुरू झाली. विविध सरकारी योजनांचा लाभ, गॅस सिलिंडरचे अनुदान, धान्यवाटप, विविध प्रकारच्या शिष्यवृत्ती आदींसाठी आधार कार्डची गरज भासते.
तसेच, निवडणूक आयोगाने मतदारयादीशी आधार क्रमांक जोडण्याची मोहीम हाती घेतली आहे. अशा विविध कारणांमुळे सर्वसामान्य नागरिकांना आधार कार्डची गरज भासते. त्यामुळेच आता आधारच्या नोंदणीसाठी नागरिकांची गर्दी होऊ लागली आहे.
आधारसाठी नोंदणीची प्रक्रिया पूर्णपणे मोफत आहे. मात्र, शहराच्या काही भागांमध्ये या नोंदणीसाठी नागरिकांकडून पैसे उकळण्यात येत असल्याच्या तक्रारी जिल्हा प्रशासनाकडे करण्यात आल्या होत्या.
येरवडा, चंदननगर आणि अन्य काही भागांमध्ये नागरिकांनी अशा तक्रारी केल्या. या संदर्भात संबंधित एजन्सींची चौकशी सुरू करण्यात आली असून, पैसे घेतल्यास संबंधितांवर कारवाई करण्यात येईल, असे उपजिल्हा निवडणूक अधिकाऱ्यांनी सांगितले. जिल्ह्यात १७० ठिकाणी आधार नोंदणी केंद्रे सुरू करण्यात आली आहेत. मशिन्सची संख्या मर्यादित असल्याने 'महा ई सेवा' केंद्रात आधार नोंदणीसाठी गर्दी होऊ लागली आहे. त्यामुळे अर्ज दिल्यानंतर दोन दिवसांनंतरची तारीख देण्यात येते. परंतु, दोनशे ते पाचशे रुपये दिल्यास तत्काळ नोंदणी करण्यात येते, अशा तक्रारी प्राप्त झाल्या होत्या. त्यामुळे चौकशीत तथ्य आढळल्यास संबंधित एजन्सीची मान्यता रद्द करण्याचा इशारा प्रशासनाने दिला आहे.
आधार-मतदार क्रमांक लिंक कसे करणार !
https://ceo.maharashtra.gov.in या वेबसाइटवर 'अपडेट युवर आधार' या पोर्टलवर टिचकी मारावी. त्यानंतर मतदार यादीतील सर्च नेमवर टिचकी मारून त्यामध्ये जिल्हा, मतदार संघ, नाव याची माहिती भरावी. त्यानंतर आधार क्रमांकाची माहिती भरावी. त्यानंतर आधार कार्डची जेपीईजी किंवा पीडीएफ फाइल अपलोड करावी. त्यानंतर काही वेळातच आधार क्रमांक मतदान ओळखपत्राशी लिंक होईल.
मोबाइल अॅप डाउनलोड करा आणि राहा अपडेट
