पुणे आणि पिंपरी चिंचवड शहरालगतच्या ग्रामीण भागात पूर्ववैमनस्यातून गोळीबार करून खुनी हल्ला करणाऱ्या दोन वेगवेगळ्या टोळ्यांना गजाआड करण्यात जिल्हा ग्रामीण पोलिसांच्या स्थानिक गुन्हे अन्वेषण शाखेला यश आले आहे. एप्रिल महिन्यात झालेल्या या दोन्ही गुन्ह्यांमध्ये पोलिसांनी एकूण १५ आरोपींना अटक केली असून, त्यांच्याकडून आठ पिस्तुले, १२ जिवंत काडतुसे, दोन कोयते, दोन तलवारी आणि तीन मोटार सायकली जप्त करण्यात आल्या आहेत.
रांजणगाव एमआयडीसी येथे २७ एप्रिल रोजी दुपारी चार वाजता गोरक्ष काळे यांच्यावर चार ते पाच तरूणांनी पिस्तुलाने गोळीबार केल्याची घटना घडली होती. या घटनेबाबत रांजणगाव पोलिस ठाण्यात गुन्हा दाखल करण्यात आला आहे. घटनेचा तपास स्थानिक गुन्हे अन्वेषण शाखेकडे सोपविण्यात आला होता. फेब्रुवारी २०१५मध्ये मुलीस शिवीगाळ केल्याच्या कारणावरून शब्बीर शेख आणि गणेश काळे या दोघांना निमोणे ग्रामस्थांकडून मारहाण करण्यात आली होती. त्याचा वचपा काढण्यासाठी शब्बीर अजीज शेख, गणेश पांडुरंग काळे, गणेश श्रीरंग महाजन, सतीश रावसाहेब रासकर, केतन हंसराज सल्ले यांनी संगनमाताने गोरक्ष काळे यांच्यावर खुनी हल्ला केल्याचे तपासादरम्यान समोर आले. यामध्ये पोलिसांनी गणेश काळे, गणेश महाजन, सतीश रासकर, केतन सल्ले यांना अटक केली. सध्या चारही आरोपींना पोलिस कोठडीत ठेवण्यात आले आहे.
तसेच, दुसऱ्या घटनेत बांधकाम व्यावसायिक विठ्ठल चव्हाण यांच्यावर २२ एप्रिल रोजी रावेत येथील निवृत्ती लॉन्सजवळ हल्ला करण्यात आला होता. या प्रकरणी खंडणीविरोधी पथकाने प्रशांत भगवान केदारी उर्फ बाबू भोंडवे (वय २२, रा. श्रीनाथ कॉलनी, थेरगाव) या सराईत गुन्हेगारास औंध जिल्हा हॉस्पिटलच्या परिसरातून मंगळवारी (५ मे) अटक केली आहे. त्याच्याकडून एक पिस्तूल आणि तीन जिवंत काडतुसे जप्त करण्यात आली.
चव्हाण यांच्यावरील हल्ला हा सुपारी घेऊन केल्याचे पोलिस तपासात निष्पन्न झाले. राजू सहादू बुचडे (वय ४८), प्रवीण राजू बुचडे (वय २४), अक्षय उर्फ भोऱ्या सर्जेराव बुचडे (वय २०, सर्व रा. मारुंजी, मुळशी) यांनी शशिकांत उर्फ पप्पू प्रकाश धुमाळ (वय, २९, रा. माण, मुळशी) याच्यामार्फत गणेश संभाजी तोंडे (वय २२, रा. मावळ), पिंटू अशोक नार्वेकर (वय २९, रा. रहाटणी), राहुल सदाशिव कांबळे (वय २०) साईनाथ सुरेश शेलार (वय २६, रा. दोघे रा. शेलारवाडी, मावळ), रियाज कुतबुद्दीन सय्यद (वय २२, रा. सोमाटणे फाटा), नरेंद्र तुकाराम भोसले (वय २८, रा. वाल्हेकरवाडी) यांना सुपारी दिली.
या सर्वांना पोलिसांनी अटक केली आहे. या वेळी सुरुवातीला एक पिस्तुल जप्त केले होते. त्यानंतर पुन्हा तीन पिस्तुले, जिवंत काडतुसे, दोन कोयते, दोन तलवारी व तीन मोटारसायकली जप्त केल्या.
मोबाइल अॅप डाउनलोड करा आणि राहा अपडेट
