ऑनलाइन सातबारा व दस्तावेज योजनेचा प्रारंभ भोर तालुक्यातून झाला असला, तरी तांत्रिक बिघाडामुळे भोरमध्येच या सुविधेचा बोजवारा उडाला आहे. त्यामुळे गेल्या अडीच महिन्यांपासून भोर तालुक्यात सातबाराचे उतारे ऑनलाइन मिळणे शक्य झालेले नाही. या बिघाडामुळे शेतकऱ्यांना ऑनलाइन सातबारा सहज मिळत नाही. फेरफार व दस्तासह इतर नोंदीही कूर्मगतीने सुरू असल्याने त्यासंबधीची अनेक कामे ठप्प झाली आहेत. प्रशासकीय कामाची गती वाढावी, तलाठ्याकडील हस्तलिखित बंद करून काम कामकाजात पारदर्शीपणा वाढावा या उद्देशाने या योजनेचा शुभारंभ भोर तालुक्यातून ३१ जानेवारीला महसूलमंत्र्यांच्या हस्ते झाला होता.
या योजनेसाठी स्वतंत्र कम्प्युटर सेंटर उभारण्यात आले होते. तालुक्यातील सर्व तलाठी कार्यालयातील कागदपत्रांचे कम्प्युटरायझेशन करण्यात आले आहे. त्यासाठी संबंधित कर्मचाऱ्यांना आणि काही तलाठ्यांनाही त्यासंबंधी प्रशिक्षण देण्यात आले आहे. त्यानंतर या नोंदीचा डाटा अपलोड करणे आदी कामांसाठी सुमारे दीड महिना गेला. प्रत्यक्षात काम सुरू झाल्यानंतर खरेदीखत, हक्कसोडपत्र, चुका दुरुस्ती, गहाणखत, बक्षीसपत्र, संमतिपत्र आदी प्रकरणे आणि जो फेरफार ऑनलाइन होत नाही तो तलाठ्याकडे पाठवून अ पत्रकाप्रमाणे दुरुस्त करणे अशी कामे फक्त १० ते १५ टक्केच झाली आहेत.
कम्प्युटर सेंटरमध्ये इतर प्रकरणातील सातबारा तांत्रिक अडचणीमुळे कम्प्युटरवर ओपन होत नाही. 'डेटा नॉट अँव्हेलेबल, एरर अशा सूचना येत असल्यामुळे ही कामे रखडली आहेत. राज्यातील सर्व ऑनलाइन कामांसाठई राज्याचे मुंबईत एकच केंद्र आहे. त्या ठिकाणी एका सर्व्हरवरून सर्व डाटा पाठविण्यात येतो. तालुक्यातील सर्व तलाठ्यांना देण्यात आलेल्या डेटा कार्डवर नोंदी होत नाहीत. नोंदींसाठी भोरमधील कम्प्युटर सेंटरमध्ये दिवसभर बसल्यानंतर दोन ते तीन नोंदी होतात. मात्र, त्यामुळे तलाठ्यांच्या वेळेचा अपव्यव होतो आहे. परिणामी काही ठिकाणी पुन्हा हस्तलिखित सातबारा देण्यात येत आहे. मात्र त्याचा उपयोग बँक अथवा खरेदीखतामध्ये होत नसल्याने वादाचे प्रसंग उद्भवत आहेत.
तांत्रिक बिघाड का?
तालुक्यातील तलाठ्यांनी दिलेल्या माहितीनुसार सातबाराच्या माहितीचे संकलन पूर्ण होण्याच्या आधीच योजना सुरू करण्याची घाई करण्यात आली आहे. संकलन अपुरे असल्याने तांत्रिक अडचणी येत असल्याचेही त्यांनी सांगितले. याबाबत एनआयसीच्या कर्मचाऱ्यांकडेही तलाठ्यांनी अडचणी मांडल्या होत्या. त्यावर कोणतीही समाधानकारक उत्तरे मिळालेली नाहीत. सर्व माहिती संकलित झाल्यानंतरच ऑनलाइन सुविधा सुरू करावी अशी माहिती जिल्हा तलाठी संघटनेतर्फे देण्यात आली.
प्रशासन प्रयत्नशील
सातबारा ऑनलाइन देण्यासाठी वापरण्यात येणारे सॉफ्टवेअर अतिशय संथ गतीने काम करीत आहे. त्यातील त्रुटी काढण्यासंबधी दोन बैठका घेऊन त्या त्रुटी दूर करण्याचे प्रयत्न सुरू आहेत. लवकरच योजना पूर्ण क्षमतेने कार्यन्वित होईल आणि नागरिकांना सातबारा व इतर कामे वेळेत मिळतील असे प्रशासनातर्फे सांगण्यात आले आहे.
मोबाइल अॅप डाउनलोड करा आणि राहा अपडेट
