म. टा. प्रतिनिधी, पुणे
सोनसाखळी चोरांकडून शहरात सोन्याचे दागिने हिसकावण्याचे सत्र गेल्या काही दिवसांपासून कायम आहे. कोथरूड, वाकड आणि चतुःश्रृंगी येथे गेल्या दोन दिवसांत तीन ठिकाणी या घटना घडल्या असून त्यात दीड लाख रुपयांचा ऐवज हिसकावण्यात आला आहे.
दीनानाथ मंगेशकर हॉस्पिटलजवळ रस्त्याच्याकडेला उभ्या असलेल्या महिलेच्या गळ्यातील मंगळसूत्र हिसकावण्यात आले. या प्रकरणी दिलीप येवले (वय ४०, रा. नारायण पेठ) यांनी पोलिसांत तक्रार दाखल केली आहे. पोलिसांनी दुचाकीवरील दोघा आरोपींविरद्ध जबरी चोरीचा गुन्हा दाखल करण्यात आला आहे.
येवले हे आपल्या पत्नीसह रस्त्याच्याकडेला पार्क केलेली दुचाकी काढत असताना, दुसऱ्या दुचाकीवर आलेल्या आरोपींनी त्यांच्या पत्नीच्या गळ्यातील ५० हजार रुपये किमतीचे सोन्याचे मंगळसूत्र हिसकावले.
दुसऱ्या घटनेत, बाणेर परिसरातील विरभद्रनगर येथे आपल्या मुलीला शाळेतून घरी घेवून परतत असलेल्या महिलेच्या गळ्यातील मंगळसूत्र आणि साखळी असा सुमारे ४१ हजार रुपयांचा ऐवज हिसकावण्यात आला आहे. या प्रकरणी चतुःश्रृंगी पोलिस ठाण्यात गुन्हा दाखल झाला आहे.
तिसऱ्या घटनेत, वाकड येथे बिर्ला हॉस्पिटलसमोर भाजी आणण्यासाठी पायी चाललेल्या महिलेच्या गळ्यातील ६० हजार रुपये किमतीचे सोन्याचे मंगळसूत्र हिसकावण्यात आले आहे. या प्रकरणी वाकड पोलिस ठाण्यात जबरी चोरीचा गुन्हा दाखल करण्यात आला आहे.
गेल्या काही दिवसांपासून सोनसाखळी हिसकावणारी टोळी शहरात सक्रिय झाली असून त्यांनी सुमारे ४० गुन्हे केले आहे. या गुन्ह्यांत आरोपींनी १६ लाख रुपयांनी अधिक किमतीचा ऐवज हिसकावला आहे. त्या तुलनेत पोलिसांनी केवळ तीन गुन्हे उघडकीस आणले आहेत. सोनसाखळी हिसकावणाऱ्या टोळ्या गजाआड केल्याशिवाय या गुन्ह्यांना आळा बसणार नाही. मात्र, या टोळ्यांना अटकाव आणण्यासाठी ठोस पावले उचलली जात नसल्याचे टीका होते आहे.
मोबाइल अॅप डाउनलोड करा आणि राहा अपडेट