म. टा. प्रतिनिधी, पुणे
मालमत्ता खरेदीविक्रीच्या व्यवहार करताना त्यावर स्टॅम्पड्यूटी किती भरायची, याचे उत्तर आता नागरिकांना बसल्याजागी मिळणार आहे. नोंदणी व मुद्रांकशुल्क विभागाने यासाठी स्टॅम्पड्यूटी कॅल्क्युलेटर हे अॅपल व अँड्रॉइड अॅप तयार केले आहे.
राज्याचे नोंदणी महानिरीक्षक डॉ. श्रीकर परदेशी यांची पंतप्रधान कार्यालयात उपसचिवपदी नियुक्ती झाली असून एन. रामास्वामी यांनी मंगळवारी या पदाची सूत्रे स्वीकारली, त्या वेळी परदेशी यांनी ही माहिती दिली. मालमत्ता खरेदीविक्रीचे व्यवहार करताना त्यावर नेमकी किती स्टॅम्पड्यूटी भरावी, याबाबत नागरिकांना मोठा संभ्रम असतो, त्यासाठी वकील व अन्य मध्यस्थांकडे धाव घ्यावी लागते. हे टाळण्यासाठी हे अॅप तयार करण्यात आले आहे. आयफोन किंवा आयपॅड वापरणाऱ्यांनी स्टॅम्पड्यूटी कॅल्क्युलेटर हे अॅप डाउनलोड करावे; तर अँड्रॉइड फोन वापरणाऱ्यांनी प्लेस्टोअरमधून स्टॅम्पड्यूटी सारथी अॅप डाउनलोड करावे. त्यामध्ये संबंधित मालमत्तेचा तपशील आणि किमतीची माहिती भरावी, मालमत्तेचा विक्री व्यवहार, अॅग्रिमेंट, भाडेकरार अशा व्यवहारांचा तपशील सादर करावा. मालमत्ता महापालिकेत आहे, नगरपालिका हद्दीत आहे, गाव असल्यास एमएमआरडीए, पीएमआरडीए किंवा नागपूर सुधार प्रन्यासच्या हद्दीत किंवा बाहेर आहे, असा तपशील सादर केल्यावर स्टॅम्पड्यूटीची नेमकी रक्कम नागरिकांना मिळणार आहे. तसेच, यामध्ये ऑटो अपडेटची सुविधा उपलब्ध करून देण्यात आली आहे. त्यामुळे दर वर्षी रेडी रेकनरचे दरही यामध्ये अपडेट होणार आहेत, असे त्यांनी सांगितले.
दरम्यान, राज्याच्या नोंदणी व मुद्रांक विभागाने अनेक सुविधा उपलब्ध करून दिल्या असून त्यामुळे राज्य या क्षेत्रात आघाडीवर आहे. या सुविधांमध्ये वाढ करण्याची परंपरा सुरू ठेवू, असे रामास्वामी यांनी सांगितले.
उत्पन्नात वाढ; दस्तनोंदणीत घट
नोंदणी व मुद्रांकशुल्क विभागाच्या उत्पन्नात यंदा वाढ झाली असून गेल्या वर्षभरात विभागास वीस हजार ५४ कोटी रुपयेइतके उत्पन्न मिळाले आहे. मात्र, दस्तांच्या नोंदणीत गेल्या वर्षीपेक्षा सुमारे साठ हजारांनी घट झाली आहे. त्यामुळे रेडी रेकनरच्या दरात झालेल्या वाढीने उत्पन्नात वाढ झाल्याचे समोर आले आहे.
मोबाइल अॅप डाउनलोड करा आणि राहा अपडेट
