म. टा. प्रतिनिधी, पुणे
संगमवाडी ते विश्रांतवाडी या बहुचर्चित बीआरटी मार्गावर सोमवारी पीएमपी बसची चाचणी घेण्यात आली. चाचणी झाली असली तरी, संगमवाडी ते विश्रांतवाडी तसेच औंध ते रावेत या मार्गांवर प्रत्यक्षात बीआरटी सुरू होण्यासाठी आणखी दोन महिन्यांचा कालावधी लागण्याची शक्यता आहे. आणखी दोन महिने चाचणी घेतल्यानंतरच हे मार्ग सुरू केले जातील, असे महापौर दत्तात्रय धनकवडे यांनी सांगितले.
कोट्यवधी रुपये खर्च करून महापालिकेने संगमवाडी ते विश्रांतवाडी, नगररोड तसेच औंध भागात बीआरटी मार्ग उभारले आहेत. या मार्गावर इंटलिजंट ट्रॅफिक मॅनेजमेंट सिस्टीम (आयटीएमएस) बसविल्याशिवाय हे मार्ग सुरू करणार नाहीत, अशी भूमिका 'पीएमपी'ने घेतली होती. दोन्ही महापालिकांनी 'आयटीएमएस'साठी निधी देऊन ही यंत्रणा तातडीने बसवून हे मार्ग सुरू करण्याच्या सूचना 'पीएमपी'ला दिल्या. प्रायोगिक तत्वावर संगमवाडी ते विश्रांतवाडी या बीआरटी मार्गावर ही यंत्रणा बसविण्यात आली आहे. या यंत्रणेची चाचणी सोमवारी घेण्यात आली. महापौर दत्तात्रय धनकवडे, स्थायी समितीच्या अध्यक्षा अश्विनी कदम, पीएमपीच्या सीईओ मयुरा शिंदेकर, सहव्यवस्थापकीय संचालक डॉ. प्रवीण आष्टीकर, संचालक विजय देशमुख यांच्यासह अनेक अधिकारी यावेळी उपस्थित होते. साडेतीन किलोमीटरच्या अंतरावर ही चाचणी घेण्यात आली. बीआरटी मार्गावर बसविण्यात आलेल्या 'आयटीएमएस' यंत्रणेचा उपयोग कसा होतो, याची चाचणी घेण्यासाठी ही चाचणी घेण्यात आल्याचे धनकवडे यांनी पत्रकारांशी बोलताना सांगितले. सध्या प्राथमिक स्वरूपात केवळ ५ बसना ही यंत्रणा बसवण्यात आली आहे. बीआरटी मार्गावरून धावणाऱ्या सुमारे २२० पीएमपीच्या बसना ही यंत्रणा बसवण्यात येणार आहे. यासाठी दोन महिन्यांचा कालावधी लागणार आहे. त्यामुळे आगामी दोन महिन्यांमध्ये या मार्गावर चाचणी ट्रायल घेतल्या जाणार आहेत. त्यानंतरच खऱ्या अर्थाने हे मार्ग सुरू होतील, असा विश्वास धनकवडे यांनी व्यक्त केला.
बसची माहिती 'आयटीएमएस'द्वारे देणार
बसस्टॉप तसेच बसमध्ये ऑटोमेटिक दरवाजे बसवण्यात आले आहेत. बस स्टॉपवर आल्यानंतर दरवाजे कसे उघडतात, प्रत्येक बसस्टॉप येण्यापूर्वी त्याची माहिती मराठी आणि इंग्रजी भाषेत दिली जाते, बसमध्ये डिस्प्लेद्वारे ही माहिती सतत दिली जाते. बसस्टॉपवर कोणती बस किती वेळात येणार आहे, त्यानंतरची बस किती मिनिटांच्या अंतराने उपलब्ध होईल याची सविस्तर माहिती 'आयटीएमएस'द्वारे दिली जाणार आहे.
मोबाइल अॅप डाउनलोड करा आणि राहा अपडेट
