राज्याचे नोंदणी व मुद्रांक महानिरीक्षक डॉ. श्रीकर परदेशी यांना पंतप्रधान कार्यालयात प्रतिनियुक्तीवर बढती मिळाल्यामुळे त्यांना पिंपरी-चिंचवड महापालिकेच्या आयुक्त पदावरून तडकाफडकी हटविणाऱ्या राष्ट्रवादी काँग्रेसला सणसणीत चपराक बसली आहे. डॉ. परदेशी २७ मे २०१२ ते दोन जुलै २०१४ कालावधीत पिंपरी-चिंचवड महापालिकेचे आयुक्त होते. त्यांना या ठिकाणी आणण्यामध्ये तत्कालीन उपमुख्यमंत्री अजित पवार यांचा मोलाचा वाटा होता. मात्र, राष्ट्रवादी काँग्रेसच्या स्थानिक नेत्यांनी विशेषतः तत्कालिन पदाधिकारी मोहिनी लांडे, विलास लांडे, लक्ष्मण जगताप, अण्णा बनसोडे, योगेश बहल, मंगला कदम यांनी डॉ. परदेशी यांच्या कार्यपद्धतीवर आक्षेप घेत डॉ. परदेशी यांच्या बदलीचा अजित पवार यांच्याकडे आग्रह धरला होता. त्याची दखल घेऊन परदेशी यांची बदली करण्यात आली होती.
हायकोर्टाच्या आदेशानुसार डॉ. परदेशी यांनी अनधिकृत बांधकामांवर कारवाई केली. ते राजकीय दबावाला बळी पडले नाहीत. चुकीच्या कामांची पाठराखणही केली नाही. त्याचा सर्वाधिक त्रास 'राष्ट्रवादी'ला होत असल्याच्या तक्रारी करण्यात आल्या. तर, आमदार जगताप यांनी डॉ. परदेशी यांची बदली न झाल्यास मावळ लोकसभा मतदारसंघातून राष्ट्रवादी काँग्रेसची उमेदवारी स्वीकारणार नाही, अशी अट घातली होती. त्यामुळे डॉ. परदेशी यांची तडकाफडकी बदली करण्यात आली. त्यामुळे 'राष्ट्रवादी'ला हायसे वाटले. परंतु, या कर्तव्यदक्ष अधिकाऱ्याची बदली रद्द व्हावी, या मागणीसाठी शहरात निदर्शने झाली. तत्कालीन मुख्यमंत्री पृथ्वीराज चव्हाण आणि उपमुख्यमंत्री अजित पवार यांचा तीव्र निषेध करण्यात आला. उत्स्फूर्तपणे रॅली, मेणबत्ती मोर्चा काढण्यात आला. ठिय्या आंदोलन करण्यात आले होते. त्यासाठी भारतीय जनता पक्षासह शिवसेना, आम आदमी पक्ष, नागरी हक्क सुरक्षा समिती, सजग नागरिक मंच यांनी पुढाकार घेतला होता.
प्रामाणिकपणाची पावती
केंद्रात भारतीय जनता पक्षाच्या सरकारने डॉ. परदेशी यांना थेट पंतप्रधान कार्यालयात उपसचिव पदावर नियुक्त केले आहे. त्यांच्यासारख्या कर्तव्यदक्ष अधिकाऱ्याची येथे पारख होऊ शकली नाही, अशी खंत व्यक्त करण्यात येत आहे. परंतु, प्रामाणिकपणे काम केल्याची पावती त्यांना मिळाल्याचा आनंद व्यक्त करण्यात आला.
मोबाइल अॅप डाउनलोड करा आणि राहा अपडेट
