फळमाशीच्या प्रादुर्भावामुळे युरोपने हापूस आंब्यावर घातलेली बंदी उठवण्यात आल्यानंतर 'कोकणचा राजा' पुन्हा युरोपात जायला लागला आहे. युरोपातील लंडन, पॅरिस आणि जर्मनीच्या खवय्यांसाठी 'व्हेपर हीट ट्रीटमेंट' (गरम वाफेची प्रक्रिया) करून बारा मेट्रिक टन हापूस आंब्याची निर्यात करण्यात आली आहे. एका वर्षाच्या बंदीनंतर आंब्याची ही पहिली युरोपवारी आहे.
गेल्या वर्षी फळमाशीच्या प्रादुर्भावामुळे युरोपीय देशांनी हापूस आंब्यावर बंदी घातली होती. त्यामुळे भारतचीय शेतकऱ्यांचे कोट्यवधी रुपयांचे नुकसान झाले. भारतातून सुमारे शंभर कोटींहून अधिक रुपयांची आंब्याची निर्यात होते. युरोपीय देशांनी बंदी उठवल्याचे अलीकडेच जाहीर केले. त्यानंतर आंब्याची निर्यात पुन्हा सुरू झाली आहे.
'युरोपीय देशांनी रत्नागिरीच्या आंब्याच्या आयातीवर असलेली बंदी काही दिवसांपूर्वीच उठवली आहे; मात्र फळमाशीचा प्रादुर्भाव टाळण्यासाठी योग्य ती प्रक्रिया करून आंबा पाठवावा, अशी सूचना युरोपीय देशांनी केली होती. केंद्र सरकारने अगोदर ठेवलेली अट निर्यातदारांना मान्य नव्हती. त्यामुळे 'अपेडा'ने कोकण कृषी विद्यापीठाला याबाबत प्रयोग करण्याची विनंती केली. तत्पूर्वी 'हॉट वॉटर ट्रीटमेंट'ऐवजी 'व्हेपर हीट ट्रीटमेंट'(गरम वाफेची प्रक्रिया) करण्याची परवानगी केंद्राकडून घेण्यात आली. त्यानुसार प्रक्रिया केलेला बारा मेट्रिक टन आंबा दोन दिवसांपूर्वी पॅरिस, लंडन, जर्मनीत निर्यात करण्यात आला,' अशी माहिती कृषी व प्रक्रियायुक्त अन्न उत्पादने निर्यात विकास प्राधिकरणाचे (अपेडा) राज्याचे उपमहाव्यवस्थापक डॉ. सुधांशू यांनी 'मटा'ला दिली.
दरम्यान, मुंबईतील 'के. बी. एक्स्पोर्ट'तर्फे चारशे किलो आंबे लंडनला निर्यात करण्यात आले आहेत. 'सहकारमंत्री चंद्रकांत पाटील यांनी नवी मुंबई येथे 'व्हेपर हीट ट्रीटमेंट' उपलब्ध करून दिल्याने निर्यातीसाठी मदत झाली. यापुढे आम्ही अमेरिकेसह अन्य देशांत आंबा निर्यात करणार आहोत. अमेरिकेच्या निर्यातीसाठी आवश्यक असलेली इरॅडिएशनची सुविधा लवकरच उपलब्ध होणार असल्याने फायदा होईल,' अशी प्रतिक्रिया 'के. बी. एक्स्पोर्ट'चे प्रकाश खख्खर यांनी व्यक्त केली.
युरोपीय देशांत बारा मेट्रिक टन आंब्याची निर्यात झाली आहे. लवकरच न्यूझीलंडमध्येही आंब्याची निर्यात होणार आहे.
- मिलिंद आकरे, सरव्यवस्थापक, कृषी पणन मंडळ
मोबाइल अॅप डाउनलोड करा आणि राहा अपडेट
