पार्किंगचा ठेका देताना महापालिकेने ठरवून दिलेल्या शुल्काकडे दुर्लक्ष करत शहरातील काही ठेकेदार दुप्पट तर काही भागात चक्क पाचपट शुल्क वसूल करत पुणेकरांची लूट करत असल्याची माहिती समोर आली आहे. गणेश कला क्रीडा केंद्र येथे असलेल्या पार्किंगसाठी दोन रुपये घेणे अपेक्षित असतानाही संबधित ठेकेदार नागरिकांकडून दहा रुपये घेत असल्याचे पुढे आले आहे.
शहराच्या विकास आराखड्यात आरक्षित असलेल्या अनेक जागांवर महापालिकेने पार्किंग उभारली आहेत. टेंडर काढून महापालिकेने ही पार्किंग ठेकेदारांना चालविण्यासाठी दिली आहेत. या पार्किंगमधून पालिकेला दर वर्षी लाखो रुपयांचे उत्पन्न मिळते. पार्किंगचा ठेका देताना संबधित ठेकेदाराने दुचाकी वाहनचालकांकडून तसेच चारचाकी वाहनचालकाकडून तासाला किती शुल्क आकारायचे याबाबतचे दर निश्चित करण्यात आले आहे. त्यानुसारच ठेकेदारांनी वाहनचालकांकडून पैसे घेणे गरजेचे आहे. मात्र शहरातील बहुतांश ठेकेदार मनमानी कारभार करत जादा पैसे घेत पुणेकरांची लूट करत असल्याचे समोर आले आहे. महापालिकेने ठरवून दिलेल्या दरापेक्षा पार्किंग चालक जादा दर घेत असल्याच्या तक्रारी वारंवार महापालिका प्रशासनाकडे करूनही याकडे जाणीवपूर्वक दुर्लक्ष करत असल्याचा आरोप नागरिकांकडून केला जात आहे.
महापालिकेने ठेकेदारांबरोबर केलेल्या करारानुसार दुचाकीसाठी दोन तर चारचाकीसाठी पाच रुपये शुल्क घेणे बंधनकारक आहे. असे असतानाही मंडई परिसरातील आर्यन पार्किंग, सिंहगड रोडवरील पु. ल. देशपांडे उद्यान, बालगंधर्व, तसेच महापालिकेच्या मुख्य इमारतीमध्ये पार्किंगसाठी दुचाकीसाठी पाच रुपये घेतले जातात. तर गणेश कला क्रीडा येथील मोकळ्या जागेत केल्या जाणाऱ्या पार्किंगसाठी ठेकेदाराकडून दहा रुपये घेतले जातात.
शहरातील पार्किंग ठेकेदारांकडून होत असलेल्या लुटीच्या अनेक तक्रारी पालिकेच्या भूसंपादन विभागाकडे करण्यात आलेल्या असतानाही त्याकडे लक्ष देऊन त्याची कोणतीही शहानिशा या विभागातील कर्मचारी किंवा अधिकारी करत नसल्याचे या निमित्ताने समोर आले आहे.
महापालिकेने केलेल्या करारानुसार नियमाप्रमाणेच ठेकेदारांनी वाहनचालकांकडून पार्किंगसाठी पैसे घेतले पाहिजे. जे ठेकेदार चुकीच्या पद्धतीने पैसे घेत असतील, त्यांना नोटिसा देऊन त्यांच्यावर कारवाई केली जाईल.
- सतीश कुलकर्णी (उपायुक्त, भूसंपादन आणि व्यवस्थापन)
मोबाइल अॅप डाउनलोड करा आणि राहा अपडेट