स्वातंत्र्यवीर विनायक दामोदर सावरकर यांचे 'माझी जन्मठेप' हे आत्मपर पुस्तक आता मोडी लिपीतही प्रकाशित केले जाणार आहे. स्वातंत्र्यवीर सावरकर राष्ट्रीय स्मारक समितीने या पुस्तकाचे मोडी लिपीत पुनर्मुद्रण करण्यासाठी पुढाकार घेतला असून, या पुस्तकाच्या लिप्यंतराचे काम सुरू करण्यात आले आहे.
मोडी लिपीला गेल्या नऊशे वर्षांचा इतिहास आहे. इतिहासातील महत्त्वाच्या घटनांची नोंदही मोडी लिपीतच करण्यात आली. बरीच वर्षे मोडी लिपी व्यवहारातही वापरली जात होती. मात्र, स्वातंत्र्योत्तर कालखंडात मोडी लिपीचे व्यवहारातील महत्त्व कमी झाले. मोडी लिपीतील साहित्याची नवनिर्मिती झाली नाही. 'माझी जन्मठेप' पुस्तक मोडीत आल्यामुळे ही उणीव भरून निघणार आहे. स्वातंत्र्योत्तर काळात मोडी लिपीत नवे असलेले हे पहिलेच पुस्तक ठरणार आहे, अशी माहिती मोडी अभ्यासक राजेश खिलारी यांनी 'मटा'ला दिली. खिलारी यांच्याच मार्गदर्शनाखाली सहा जणांचा गट हे लिप्यंतराचे काम करत आहे.
'महाराष्ट्रात सावरकरांच्या साहित्याविषयी कायमच उत्सुकता आहे. त्यांच्या भाषेला धक्का न लावता लिप्यंतर करण्याचे शिवधनुष्य पेलायचे आहे. त्यासाठी मोडीतील जाणकारांना सोबत घेऊन लिप्यंतर करण्यात येत आहे. या पुस्तकाची माहिती राज्यभरातील मोडीप्रेमींमध्ये सोशल मीडियाच्या माध्यमातून आणि वैयक्तिक स्तरावर पोहोचवण्यात येत आहे. या कल्पनेचे उत्स्फूर्त स्वागत करून बऱ्याच जणांनी आगावू नोंदणीही केली आहे. २८ मेपर्यंत मोडी लिपीतील 'माझी जन्मठेप' उपलब्ध होईल,' असेही खिलारी यांनी स्पष्ट केले.
मोडी लिपीत नवीन पुस्तके नाहीत. त्यामुळे सावरकरांचे पुस्तक मोडी लिपीमध्ये मुद्रित करावे अशी कल्पना पुढे आली. सर्वप्रथम 'माझी जन्मठेप'चे लिप्यंतर करण्यात येत आहे. त्याला मिळणाऱ्या प्रतिसादावरून बाकी पुस्तकांचाही विचार करण्यात येईल. - रणजित सावरकर, कार्याध्यक्ष, स्वा. सावरकर राष्ट्रीय स्मारक समिती
मोबाइल अॅप डाउनलोड करा आणि राहा अपडेट
