पुणे कँटोन्मेंट बोर्डामध्ये मनुष्यबळाची कमतरता असल्याने विविध खात्यांमध्ये कर्मचाऱ्यांची भरती करण्यात येणार आहे. ही भरती प्रक्रिया करण्यासाठी समिती नेमण्यात आली आहे. बोर्डाच्या अनेक खात्यांमध्ये कर्मचारी कमी असल्याने नागरिकांना वेळेवर सेवा मिळत नाही. त्यामुळे कर्मचाऱ्यांची भरती करण्याचा निर्णय घेण्यात आला आहे. ही भरती प्रक्रिया करण्यासाठी समिती नेमण्यात येणार आहे. बोर्डाच्या मुख्य कार्यकारी अधिकाऱ्यांच्या अध्यक्षतेखाली ही समिती असणार आहे. त्यामध्ये सदस्य म्हणून सर्व नगरसेवकांची नेमणूक करण्यात आली आहे.
बोर्डाच्या विविध खात्यांपैकी महसूल, आरोग्य आणि अतिक्रमण या प्रमुख खात्यांमध्येच मनुष्यबळ कमी आहे. महसूल विभागामध्ये कर्मचाऱ्यांचा तुटवडा असल्याने प्रॉपर्टी टॅक्स वसुलीवर त्याचा परिणाम होत आहे. अतिक्रमण विभागाला कर्मचाऱ्यांची गरज असतानाही अनेक वर्षांपासून कर्मचाऱ्यांची भरती झालेली नाही. त्यामुळे अतिक्रमणांवर नियंत्रण आणणे बोर्डाला कठीण होत आहे. आरोग्य विभागामध्ये कर्मचारी कमी असल्याने दैनंदिन साफसफाई करताना बोर्डाला अडचणीला
सामोरे जावे लागते. त्यामुळे कर्मचाऱ्यांची भरती करण्यात येणार असल्याचे प्रशासनाकडून सांगण्यात आले. या खात्यांशिवाय इंजिनियरिंग, अग्निशमन दल आणि मोटार वाहन या विभागांमध्येही कर्मचाऱ्यांची भरती केली जाणार आहे. प्रत्येक खात्यामध्ये जास्तीत जास्त २० कर्मचारी नेमण्याचे ठरविण्यात आले आहे. त्यापेक्षा जास्त कर्मचाऱ्यांची भरती करण्यात येणार नसल्याचे मुख्य कार्यकारी अधिकारी संजीव कुमार यांनी स्पष्ट केले. दरम्यान, सध्या बोर्डाच्या आरोग्य खात्यामध्ये दैनंदिन वेतनावर काम करणारे कर्मचारी आहेत. त्या कर्मचाऱ्यांना आणखी तीन महिने मुदतवाढ देण्यास बोर्डाने मान्यता दिली आहे.
मोबाइल अॅप डाउनलोड करा आणि राहा अपडेट