अलाहाबाद येथे पोलिसाकडून कोर्टाच्या आवारातच गोळी मारून वकिलाची हत्या केल्याच्या निषेधार्थ सोमवारी पुण्यातील वकिलांनी काम बंद आंदोलन केले. पुणे जिल्हा न्यायालयासह जिल्ह्यातील, तालुक्यातील कोर्टामध्येही काम बंद आंदोलन करण्यात आले. या पार्श्वभूमीवर कोर्टाच्या आवारात पोलिस चौकीत पोलिसांची शस्त्रे ठेवण्यासाठी लॉकर करण्याची मागणी त्यांनी केली.
अलाहाबाद येथे गेल्या बुधवारी पोलिसाकडून वकिलाची कोर्टाच्या आवारातच गोळी मारून हत्या करण्यात आली. या घटनेचा निषेध म्हणून सोमवारी पुण्यातील वकिलांनी काम बंद आंदोलन केले. ऑल इंडिया बार कौन्सिलतर्फे वकिलांना काम बंद आंदोलनाचे निर्देश देण्यात आले होते.
पुणे जिल्हा न्यायालयातील वकिलांनीही काम बंद आंदोलन केले. तातडीची कामे वगळता कोर्टातील कामकाज पूर्णपणे बंद होते, अशी माहिती पुणे बार असोसिएशनचे अध्यक्ष अॅड. गिरीश शेडगे यांनी दिली. अलाहाबाद येथे वकिलांवर गोळबार झाल्याच्या पार्श्वभूमीवर शिवाजीनगर कोर्टात येणाऱ्या पोलिस अधिकाऱ्यांकडील शस्त्रे कोर्टातील पोलिस चौकीमध्ये जमा करण्यात यावी. तसेच पोलिसांची सुनावणी झाल्यावर त्यांनी आपले शस्त्र परत घ्यावे, अशी मागणी असोसिएशनतर्फे करण्यात येणार असल्याचे अॅड. शेडगे यांनी सांगितले.
हाय कोर्टातही अशी सुविधा करण्यात आलेली आहे. हाय कोर्टात येणाऱ्या पोलिस अधिकाऱ्यांना पोलिस चौकीत शस्त्र जमा करावे लागते. त्यासाठी लॉकर्स करण्यात आलेले आहेत. शिवाजीनगर कोर्टातही पोलिस चौकीमध्ये असे लॉकर करण्यात यावे, अशी मागणी करणार असल्याचे अॅड. शेडगे यांनी सांगितले. दरम्यान, फॅमिली कोर्टातील एक न्यायाधीशांनी काम बंद आंदोलन असतानाही सुनावणी घेतल्याबद्दल काही वकिलांनी नाराजी व्यक्त केली.
मोबाइल अॅप डाउनलोड करा आणि राहा अपडेट